Katutubo inakalang unggoy, dinedo

MANILA, Philippines - Dahil sa pag-aakalang unggoy, napatay ang 16-anyos na binatilyong katutubo matapos itong barilin ng mangangaso sa itaas ng punungkahoy sa bayan ng Narra, Palawan kamakalawa ng hapon. Kinilala ang biktima na si Bernard Bacaltos na sinasabing mula sa lipi ng katutubong Tagbanua habang sumuko naman sa mga opisyal ng barangay ang suspek na si Normando Bungkas, 42. Napag-alamang naghahanap ng ibon, paniki, at unggoy ang suspek nang may biglang kumaluskos mula sa itaas ng punungkahoy. Sa pag-aakalang unggoy ay agad itong pinaputukan ng suspek kung saan laking gulat nito nang bumagsak mula sa itaas ng puno ang biktima. Ikinatuwiran naman ng suspek na aksidente ang pangyayari dahil inakala niyang unggoy ang biktima sa itaas ng punungkahoy.