Ret. teacher lasog sa SUV

CAVITE, Philippines – Pisak ang ulo ng isang 66-anyos na retired teacher na agad niyang ikinasawi matapos na bigla na lang umandar ang nakaparadang Sport Utility Vehicle (SUV) na nasa harapan ng biktima, kamakalawa sa Trece Martires City, Cavite.

Kinilala ni Cavite Police Director S/Supt. Joselito Esquivel Jr., ang biktimang si Alicia Amadure, retired teacher na MH Del Pilar St., Silang Cavite.

Arestado naman ang driver ng Toyota RAV 4 (XRK 798) na si Reynaldo Crencia, 40, na residente ng Bayacal St. Sabutan Silang, Cavite.

Base sa report, bandang alas-2:45 ng hapon, habang nakahimpil ang nasabing sasakyan na automatic transmission sa tapat mismo ng Regional Trial Court (RTC) sa L. Signo St., Brgy. Luciano nang i-start ni Crencia pero sa halip na matapakan ang preno ay accelerator pala ang natapakan nito kaya biglang umandar at nasapol ang biktimang nakatayo lang sa harap.

Bumagsak ang biktima nang mabangga at minalas pang magulungan ang ulo nito ng kaliwang bahagi ng gulong na agad nitong ikinasawi.