Mag-ama itinumba sa Maguindanao clan war

MANILA, Philippines – Magkaangkas sa motorsiklo ang mag-amang kapitan ng barangay at komander ng Moro Islamic Liberation Front (MILF) nang tambangan ng hindi pa nakikilalang mga suspek sa Barongis, Maguindanao kahapon.

Nakilala ang mga biktimang sina Barangay Sultan kapitan Saddam Mohammad at MILF komander Batuh Mohammad.

Patungo sana ng bayan ang mag-ama galing ng bukid nang pagbabarilin ng armadong kalalakihan sa kalsada na ikinasawi kaagad ng dalawa.

Ayon sa tagapagsalita ng 6th Infantry Division ng Army na si Col. Dickson Hermoso, isa pang MILF komander na nakilalang si Kagui Said ang nasa likod umano nang pananambang sa mag-ama.

 “These two groups had figured in several encounters in the past,” pahayag ni Hermoso sa away ng dalawang pamilya.

Aniya naglagay na sila ng peacekeeping contingent sa Barangay Sultan, Barongis, Maguindanao upang maiwasang lumala pa ang tensyon sa pagitan ng dalawang pamilya.