Negosyante utas sa holdap

LEGAZPI CITY, Albay, Philippines - – Napaslang ang 52-anyos na negosyante matapos itong holdapin ng mga di-kilalang lalaki ay pinagbabaril pa ito kahapon ng madaling araw sa Kilometro 16, Barangay Banquerohan sa Legazpi City, Albay. Hindi na umabot pa ng buhay sa Estevez Memorial Hospital ang biktimang si  Nestor Beato ng Purok 2 sa nasabing barangay. Sa ulat na nakarating kay P/Supt. Alex Pederio, hepe ng Legazpi City PNP, sakay ng motorsiklo ang biktimang patungong palengke nang harangin at holdapin ng apat na kalalakihang lulan ng dalawang motorsiklo. Gayon pa man, nanlaban ang biktima kaya niratrat ito saka tinangay ang malaking halaga na pambili ng kanyang kalakal.