Magtiyahin inakyat-bahay

CAVITE , Philippines  -  Napatay ang 11-anyos na batang babae habang kritikal naman ang kanyang tiyahin makaraang pagsasaksakin ng mga di-kilalang kalalakihan na nanloob sa kanilang bahay sa Barangay Queensrow, Bacoor City, Cavite kahapon ng madaling araw. Kinilala ng pulisya ang napaslang na si Jessica Navarro habang isinasalba naman sa pagamutan ang tiyahin nitong si Gina Bautista. Sa imbestigasyon ng pulisya, sinamantala ng mga suspek na natutulog ang magtiyahin saka isinagawa ang panloloob. Nagising naman si Gina matapos maalimpungatang at may narinig na kaluskos sa loob ng kanilang bahay. Gayon pa man, namataan ng mga kawatan si Gina kaya pinagtulungang saksakin at maging ang bata ay inundayan din ng saksak at napatay.