P1.5-M nilimas ng holdaper

BULACAN, Philippines - – Tinatayang aabot sa P1.5 milyong cash na sinasabing koleksyon sa naibentang saku-sakong bigas ang tinangay ng apat na lalaking lulan ng dalawang motorsiklo sa panibagong insidente ng holdapan sa Barangay Burol 2nd, bayan ng Balagtas, Bulacan kamakalawa ng hapon. Sa ulat ni PO1 Jerald Manalo, lumilitaw na katatapos lamang  magpapalit ng malaking halaga sa banko mula sa koleksyon ng mga bigas na naideliber ng mga mga biktimang sina Joel Galindo, drayber; Rolan Delos Santos, ricerdealer; at si Jay Mudlong, pahinante nang harangin ang kanilang trak ng apat na kalalakihang lulan  ng dalawang motorsiklo. Walang nagawa ang mga biktima kundi ibigay ang plastic bag na naglalaman ng malaking halaga habang patuloy naman ang pagsisiyasat ng pulisya.