Magsasaka inutas ng kalabang tribo

TUGUEGARAO CITY, Cagayan, Philippines – Napatay ang 20-anyos na magsasaka matapos itong ratratin ng grupo ng kalalakihan ng mapagkamalan siyang miyembro ng kalabang tribo ng mga katutubong Basao sa Barangay Appas, Tabuk City, Kalinga kamakalawa ng gabi. 
Kinilala ni P/Chief Insp. Bobby Glen Ganipac, hepe ng Tabuk City PNP ang napaslang na si Lacsa Batac ng tribong Lucog sa nasabing lungsod.
 Sinasabing napagkamalan ng grupo ng kalalakihan na pinamumunuan ni Basiyao Calasiyao ang biktima na pumasok sa kanilang teritoryo na may kasamang dalawang magsasaka. Ayon sa ulat, nadatnan ng mga suspek ang biktima na umiihi sa gilid ng kalsada nang pagbabarilin ito. Kasalukuyang nakikipag-ugnayan ang pulisya sa lider ng tribo ng Basao para sumuko ang mga suspek para maiwasan ang pagsiklab ng tribal war.