2 drayber todas sa duwelo

NORTH COTABATO, Philippines - Dalawang skylab drayber ang magkasabay na namatay matapos magsaksakan dahil sa pagsasakay ng mga pasahero sa Sitio Riverside, Denganen, bayan ng Buldon, Maguindanao kamakalawa ng hapon. Kinilala ang dalawa na sina Jaime Mondido, 53; ng Upper Denganen; at Ronald Casil ng Barangay Lower Denganen. Sa imbestigasyon ng pulisya, patungong bayan ng Buldon si Casil habang pababa naman sa bayan ang Pigcawayan, North Cotabato si Mondido nang magkasalubong pagsapit sa bahagi ng Sitio Riverside. Sinasabing nag-unahang makakuha ng pasahero ang dalawa na nauwi sa matinding awayan hanggang sa magduwelo. May matagal nang alitan ang dalawa kaya sabay na pumara at binunot ang kani-kanilang kutsilyo saka nagduwelo.