MANILA, Philippines - Kalunus-lunos na kamatayan ang sinapit ng 4-anyos na nene makaraan itong halayin ay pinagpapalo pa ng isang lalaki na sinasabing adik sa bawal na droga sa Barangay Motorpool, bayan ng Tubod, Surigao del Norte noong Martes .
Ang biktima na tinarakan pa ng matulis na kahoy sa leeg ay kinilalang si Kimberly Fidelis Kimbo ng Sitio Pingaping sa nasabing barangay.
Sa ulat, sinabi ni Supt. Martin Gamba, Spokesman ng Police Regional Office (PRO) 13, ang bangkay ng biktima ay natagpuan dakong ala-una ng hapon sa liblib na bahagi ng nasabing barangay kung saan hubu’t hubad at duguan ang ari, tadtad ng mga pasa at malalalim na sugat sa iba’t-ibang bahagi ng katawan nang marekober.
Ayon sa imbestigasyon, bago ang insidente ay namataan ng ilang testigo ang bata habang akay-akay at nilalaro ng suspek na si Joel Hardinel, 19, kapitbahay ng pamilya ng biktima.
Arestado naman ang suspek kung saan inaming wala umano siya sa katinuan ng halayin ang biktima.