1 dedbol, 2 sugatan sa rambulan

CAVITE, Philippines - – Isa ang napatay habang dalawa naman ang sugatan makaraang magrambulan ang magkalabang grupo sa Barangay Datu Esmael, Dasmariñas City, Cavite kamakalawa ng gabi. Kinilala ang napatay na si Christopher “Chris” Hizon, 21, ng Blk 7 Lot 10 Barangay San Manuel habang sugatan naman ang mag-asawang sina Sambo Dumawan, 34; at Ana Dumawan. Sa ulat ni P02 Dexter Anadilla, naganap ang bakbakan sa Berle Compound matapos magsagupa ang magkalabang grupo. Narekober sa crime scene ang ilang basyo ng bala ng cal. 45 pistol at ilang patalim na ginamit sa insidente.