Christmas party niratrat: 1 patay, 4 grabe

MANILA, Philippines - Sa halip na kasiyahan, nauwi sa madugong ba­ngungot ang Christmas Party ng organisasyon ma­tapos na mamaril ang isang lalaki kung saan nakapatay ng isa habang apat pa ang grabeng na­sugatan kahapon ng madaling-araw sa Barangay Lapidian, Pagadian City, Zamboanga del Sur.

Kinilala ang napaslang na si Ronald Alferez, 29, habang naisugod naman sa pagamutan ang mga sugatang sina Alexis Caleza, 32; Mervin Lumimpat,13; Arlyn Lagnasan, 9; at  si Angela Princess Sistoso, 6.

Sa ulat ng Pagadian City PNP, naganap ang insidente bandang alauna ng madaling araw habang  nagsasayawan kaugnay ng Christmas Party ng Women’s Organization sa Barangay Hall ng Lapidian.

Isang armadong lalaki ang bigla na lamang sumulpot sa lugar at bigla na lamang nagpaulan ng bala kung saan nagsipagpanik naman ang mga residente na nagpulasan dahil sa matinding takot.

Hindi naman namuk­haan ng mga residente ang nasabing gunman dahil sa madilim sa ilalim ng puno na pinuwestuhan nito.

Narekober naman ng mga operatiba ng pulisya ang mga basyo ng bala ng cal. 45 pistol habang pa­tuloy ang imbestigasyon.