Tserman nilikida ng tandem sa sabungan
BULACAN , Philippines — Hindi na maipagpapatuloy ng nanalong barangay chairman ang kanyang katungkulan matapos na paslangin habang lumalabas sa bisinidad ng isang sabuÂngan sa Brgy. San Pedro, Bustos, lalawigang ito kahapon.
Tatlong tama ng bala ang tumama sa iba’t ibang bahagi ng katawan na kaagad na ikinasawi ng biktimang si Romeo Taruc, 63, residente at kasalukuyang chairman ng Brgy. Hinukay sa bayan ng Baliwag.
Base sa imbestigasyon ni PO3 Merrick Vincent Santos, dakong alas-04:30 ng hapon ay lumabas ang biktima sa bisinidad ng Bustos cockpit coliseum na nasa kahabaan ng Gen. Alejo Santos Highway, Brgy. San Pedro at saka lumapit sa pag-aaring Mitsubishi Adventure SUV (RJL-649) upang umuwi.
Habang binubuksan ng chairman ang pintuan ng sasakyan ay biglang lumapit sa kanyang likuran ang isang lalaki at walang sabi-sabing pinaputukan ng tatlong beses ang ulo at katawan nito mula sa isang .45 kalibre ng baril. Nang bumulagta ang biktima, agad siyang tumakas kasama ang isang lalaking lookout sakay ng motorsiklo patungo sa direksyon ng Baliwag.
- Latest
