Mag-asawang matanda pisak sa trak

CAMP SIMEON OLA, Legazpi City, Philippines – Magkasabay na sinalubong ni kamatayan ang mag-asawang matanda makaraang mahagip ng trak sa kahabaan ng national highway sa Barangay Bolos, bayan ng Irosin, Sorsogon kahapon.

Hindi na umabot pa ng buhay sa Sorsogon Doctors Hospital ang mag-asawang Jose Cantuba, 65; at Felicisima Cantuba, 72; kapwa nakatira sa Zone 2, bayan ng Bulan, Sorsogon.

Samantala, tumakas naman ang drayber at iniwan ang kanyang trak matapos masagasaan ang mag-asawa. Base sa police report, nagmomotorsiklo ang mag-asawa nang salpukin ng 10-wheelers truck na may plakang UVL-812 dakong alas-2:45 ng hapon.

Pinaghahanap na ng pulisya ang drayber habang naka-impound naman ang trak nito sa himpilan ng pulisya.