Pekeng abogado kalaboso

BATAAN, Philippines – Rehas na bakal ang binagsakan ng 73-anyos na pekeng abogado makaraang arestuhin ng mga operatiba ng pulisya sa bayan ng Dinalupihan, Bataan kamakalawa. Pormal na kinasuhan ang pulisya ang suspek na si Virgilio Mejia ng Barangay New San Jose sa nasabing bayan. Sa police report na nakarating kay P/Senior Supt. Audie Atienza, ang suspek ay inaresto matapos ang entrapment operation kung saan nagpanggap na nagpagawa ng affidavit of loss ang pulis na si PO1 Jemer Tablang. Walang maipakitang kaukulang dokumento na nagpapatunay na ang suspek ay lehitimong abogado na matagal nang nagnonotaryo. Ayon kay Janice Piga, inamin naman ng suspect na binigyan siya ng karapatan ng isang abogado na magnotaryo subalit walang maipakitang kredensiya at magpapatunay na pasado bilang lawyer.