Biyuda kumalas sa nobyo, kinatay

NORTH COTABATO , Philippines   - Napaaga ang  kamatayan ng isang biyuda na sinasabing nakipagkalas matapos itong pagtatagain ng kanyang nobyo sa Barangay Badyangon, bayan ng Arakan, North Cotabato, kahapon ng madaling-araw

Kinilala ang biktima na si Gemma Panes Villa habang tugis naman ng pulisya ang suspek na si Cornelio Ocate Jr. na sinasabing sangkot din sa panghaharas sa detachment ng pulisya sa Kidapawan City noong 2010.

Napag-alamang hindi matanggap ni Ocate ang pakikipagkalas sa kanya ng biktima kaya pumunta ito sa bahay ng biyuda para komprontahin.

Humantong sa matinding sagutan ang dalawa kung saan hindi mapilit ni Ocate na makipagbalikan sa kanya ang nobya kaya sunud-sunod na pinagtataga ang biktima.

Naisugod pa sa ospital ang biktima subalit hindi na umabot ng buhay.