Kidnaper ng 3-anyos, huli

BULACAN, Philippines - Arestado ang isang single mother matapos na tangkain umano nitong kidnapin ang isang 3-anyos na batang lalaki habang naglalaro sa isang lugar sa Brgy. Abulalas, Hagonoy, ng lalawigang ito kahapon.

Hindi na nakapalag pa sa mga humahabol na taong bayan ng arestuhin ang suspek na si Maricel Halili 32, residente ng Brgy. San Jose sa bayan ng Baliwag.

Base sa ulat ni P01 Babylyn Parungao ng Women and Children Complaint Desk, kasalukuyang naglalaro ang batang biktima na itinago sa pangalang Jack, ng Purok-1, Brgy. Abulalas nang lapitan siya ng suspek at kunwari ay itinatanong dito kung saan ang daan patungong bayan ng Calumpit saka puwersahang binitbit ito ngunit sumigaw ang bata.

Nagkataon namang nakita ng kapitbahay ng biktima na si Rommel De Mesa ang pangyayari na naging dahilan upang sitahin ang suspek saka tinangkang tumakas ngunit naaresto din matapos ang mahabang habulan at muling nabawi  ang paslit na ibinalik sa kanyang tunay na ina.