Kinidnap na sanggol na Filipino-Canadian, yaya pinalaya na

MANILA, Philippines - Isang araw matapos na dukutin, pinalaya na ng mga kidnaper ang isang 1-anyos na sanggol na Filipino-Canadian at yaya nito sa isang mall sa Ozamis City, Misamis Occidental nitong Biyernes ng hapon.

Sa ulat ni Police Regional Office (PRO) 9 Director P/Chief Supt. Juanito Vano bandang alas- 3:30 ng hapon ng pakawalan ng mga kidnaper ang biktima na si Timothy Sokolob at yaya nitong si Caroline Demetre sa Gaisano mall sa lungsod ng Ozamis. Ang mga ito ay narekober ng Ozamis City Police.

Ang sanggol na anak ng isang Pinay sa asawa nitong Canadian ay kinidnap kasama ang yaya nito sa Rosario Homes, Dao, Pagadian City, Zamboanga del Sur noong Huwebes dakong alas-6:30 ng umaga.

Una ng humingi ng P50-M ransom ang mga kidnaper kapalit ng pagpapalaya sa sanggol at yaya nito.

Itinurnover na ang sanggol sa kaniyang mga magulang habang isinailalim naman sa debriefing sa himpilan ng pulisya ang yaya nitong si Caroline.

Hindi naman kumpirmahin ng opisyal kung may kapalit na ransom ang pagpapalaya sa mga bihag.