Lider ng YFC ni-rape slay ng adik
MANILA, Philippines - Hubo’t hubad na natagpuang patay ang 19-anyos na lider ng Youth for Christ (YFC) na pinaniniwalaang hinalay muna bago pinaslang ng di-kilalang lalaki na sinasabing adik sa bawal na droga sa bahagi ng Sta. Rosa City, Laguna noong Miyerkules.
Sa police report, ang biktimang si Riza Baybay ay tadtad ng mga gasgas at pasa sa katawan kung saan ginilitan pa at may mga tama rin ng saksak sa kaniyang hita.
Bandang alas-9 ng umaga noong Miyerkules nang madiskubre ang duguang katawan ng biktima sa madamong bahagi sa bakanteng lote sa Barangay Sta Cruz sa nasabing lungsod.
Sa ulat na nakarating sa Camp Crame, ang biktima ay inireport ng lola nitong si Ursula Baybay na umalis sa kanilang tahanan noong Enero 1 ng umaga upang magtungo sa bahay ng kaibigan kaugnay ng salu-salo sa Bagong Taon.
Gayon pa man, nabigong makauwi ang biktima hanggang sa madiskubre ang mapait nitong sinapit kamakalawa.
Isasailalim sa post-mortem examination ang bangkay ng biktima para madetermina kung hinalay ito bagaman may mga indikasyon dahil hubo’t hubad ito ng matagpuan sa crime scene.
Posible rin mga bangag sa bawal na droga ang nasa likod ng krimen, ayon pa sa pulisya habang patuloy ang imbestigasyon.
- Latest
