2 UPLB student nalunod
MANILA, Philippines - Dalawang estudyante ng University of the Philippines Los Baños (UPLB) ang natagpuang nakalutang sa mababaw na bahagi ng ilog malapit sa talon sa paanan ng Mt. Makiling sa Los Baños, Laguna noong Miyerkules ng hapon.
Kinilala ang mga biktima na sina Kevin Lagadon, 18, ng Bagong Silang, Caloocan City; at Mark Lorenz Valdes, 18, ng UPLB compound.
Sa ulat ni P/Senior Supt. Fausto Manzanilla Jr. na nakarating sa Camp Crame, bandang alas-2:45 ng hapon nang madiskubre ng mga hiker sa pangunguna ni Denver Novano ang bangkay ng dalawang estudyante matapos na malanghap ang masangsang na amoy na nagmumula sa batuhan.
Lumilitaw na ang mga biktima ay napaulat na nawawala noon pang Linggo (Dec.2) base sa log book ng monitoring station 1 ng Bureau of Forestry na nagtungo sa lugar bandang alas-9:05 ng umaga pero nabigong makabalik.
Samantala, sa inisyal na resulta ng pagsusuri ni P/Supt. Roy Camarillo, hepe ng medical legal ng Regional Crime Laboratory 4A, ang pagkamatay ng dalawang estudyante ay pagkalunod.
“There was no injuries in their bodies, no sign of hazing incident and no struggle and strangulation, even though the victims sustained a bruises in their bodies, legs and arms,” ayon sa pahayag ni Camarillo.
“There is no sign of foul play against the victims and their bruises are part of the stage of the decomposition and their lungs were swollen with water,” dagdag pa ni Camarillo
Ang university campus na nasasakupan ng Mt. Makiling Forest Reserve ay nasa hurisdiksyon din ng Barangay Batong Malake.
- Latest
