Kuya inutas ng bunso

TUGUEGARAO CITY , Philippines- Pinaniniwalaang alitan sa hatian ng inaning mais, dalawang senglot na magkapatid na magsasaka  ang nagkahamunan ng bakbakan na ikinasawi ng isa sa kanila sa Barangay Dalla sa bayan ng  Baggao, Cagayan kamakalawa. Kinilala ng pulisya ang napatay na si Benito Ramirez, 45, habang ang suspek na si Isagani Ramirez, 44, na barangay tanod ay sumuko naman sa mga opisyal ng barangay. Lumalabas sa imbestigasyon na magkasama sa inuman ang magkapatid sa idinaos na kasalan sa kanilang lugar nang maungkat ang usapan nila sa hatian sa kanilang inani.  Nabatid sa imbestigasyon na hinambalos ng tabla ng biktima ang kapatid kaya nagdilim ang paningin nito kaya inilabas ang matalim na gulok at tinadtad ng taga ang kuya hanggang sa mapatay.