Posthumous Award sa napaslang na pulis

MALOLOS CITY, Bulacan , Philippines – Dahil sa paglilingkod sa bayan kahit sa kamatayan ay gagawaran ng Posthumous Award ang napaslang na pulis na lumaban sa riding-in-tandem sa bahagi ng Ba­rangay Poblacion sa bayan ng Pandi, Bulacan may ilang araw na nakalipas.

Bukod sa nasabing award ay ipagkakaloob din sa na­patay na si PO2 Shane Michael Cruz ang lahat ng benipisyo para sa kanyang naiwang pamilya at awtomatikong itataas ang kanyang ranggo base sa rekomendasyon ng pamunuan ng PNP.

Ayon kay P/Senior Supt. Fernando Mendez Jr., Bulacan PNP director, si PO2 Cruz, 27, na nakatira sa ba­yan ng Baliwag, Bulacan ay ginampanan ang kanyang tungkulin matapos sitahin ang riding-in-tandem na may nakasukbit na baril na sinasabing walang kaukulang papeles.

Dito na niratrat ng tandem ang biktima kung saan nagkataon namang namataan ng off duty na si PO2 Tito Morales kaya sumaklolo ito at nabaril ang isa sa dalawang gunmen.

Sa follow-up operation ay nasakote naman ng mga tauhan ni P/Supt Lailene Amaro ang isa sa suspek na si  Francisco Cullado habang tinutugis naman ang kasabwat nitong si Allan Bantilan.