Shootout: Pulis, kawatan, todas

MANILA, Philippines - Napaslang ang isang pulis at isang notoryus na miyembro ng robbery gang habang isa pa ang nasugatan sa naganap na shootout sa bayan ng Nabunturan, Compos­tela Valley kahapon ng umaga. Sa ulat ni P/Chief Inspector Hector Grijaldo, hepe ng Nabunturan PNP, kinilala ang nasawing pulis na si SPO1 Julambri Astapan habang inaalam naman ang pangalan ng napatay na kawatan. Isinugod naman sa ospital ang nasugatang si PO1 Edgard Lagura. Bandang alas-8 ng umaga nang magpang-abot ang mga operatiba ng pulisya at ang grupong kawatan sa bahagi ng Barangay Poblacion matapos na tangkaing looban ng mga armadong kalalakihan ang bahay ng negosyante. Narekober sa pinangyarihan ng shootout ang cal. 9mm pistol na pag-aari ng napatay na kawatan.