Bus vs bike: 2 katao todas

QUEZON, Philippines - Isang araw bago pasinayaan ni Pangu­long Benigno “Noynoy” Aquino III ang 7.5 KM na Candelaria bypass road ay nadilig na agad ito ng dugo matapos na banggain at kaladkarin ng pampasaherong bus ang motorsiklo kamakalawa ng gabi sa Barangay Malabanban Sur sa bayan ng Candelaria, Quezon.

Patay agad sa pinangyarihan ng aksidente si Corazon Pasia ng San Juan, Batangas samantalang naisugod pa sa Candelaria District Hospital si Augusto Magpaye subalit namatay din.

Sa ulat ni P/Supt. Fran­cisco Ebreo, chief of police, dakong alas-7 ng gabi nang makasalubong ng motorsiklo  ang Raymund Bus ( EVL-993 ) ni Edmundo Terrano na patungong Lucena City, Quezon.

Sa lakas ng pagkaka­bangga ay tumilapon ang motorsiklo at nakaladkadkung saan nalasog ang mga biktima.

Sumuko sa himpilan ng pulisya ang driver ng bus na ngayon ay nahaharap sa kasong reckless imprudence resulting to double homicide.