14-anyos nagbaril sa sarili

Cavite – Dahilan sa sobrang pagmamahal sa kanyang lolang maysakit, isang 14-anyos na estudyante ang nagpakamatay matapos magbaril sa sarili sa Brgy. Bautista Sampaloc IV, Dasmariñas City kamakalawa ng hapon.

Kinilala ni Police Supt Ulysses Cruz, hepe ng pulisya sa lungsod na ito ang biktima na si Orlando Coz III, 2nd year high school student at residente ng Zone IV, Brgy Sampaloc IV Bautista ng naturang siyudad.

Sa imbestigasyon ni PO3 Paulo Figueroa, may hawak ng kaso, dakong ala-1:05 ng hapon ng maganap ang insidente sa loob ng kuwarto ng biktima saka nagbaril sa sarili gamit ang pen gun na siya nitong ikinasawi.

Bago ito ay nagkulong ang biktima sa kaniyang kuwarto bunga ng sobrang depresyon dahilan sa nasa kritikal na kondisyon ang kaniyang lola sa pagamutan sanhi ng maraming karamdamang dala ng katandaan nito. Nabatid pa na ang biktima ay lumaki sa pangangalaga ng kaniyang lola na siyang nagpalaki dito.