Usurero itinumba sa panaderya

TUGUEGARAO CITY- Sa ikalawang pagkakataon ay hindi na nakaligtas sa salubong ni kamatayan ang 32-anyos na lalaki matapos itong pagbabarilin ng riding-in-tandem sa panaderya sa Canciller Avenue, Barangay District 1, Cauayan City sa Isabela kahapon ng tanghali. Napuruhan sa ulo ang biktimang si Regie Openia ng Barangay San Francisco sa nasabing lungsod. Lumalabas sa imbestigasyon na nagmemeryenda ang biktima sa panaderya nang lapitan at ratratin. Ayon sa salaysay ng pinsang si Roberto Asis, nakaligtas sa unang pagtatangka sa buhay ng biktima matapos itong pagbabarilin din ng mga di-kilalang lalaki noong Agosto 2012. Nabatid na nagpapautang ng patubuan ang biktima kaya sinisilip ng mga imbestigador kung may kaugnayan sa kanyang pagkamatay.