Negosyante todas sa tandem

RIZAL, Philippines – Walang buhay na bumulagta ang 45-anyos na negosyanteng Bumbay matapos barilin ng riding- in-tandem habang nagsasara ng kaniyang tindahan sa Barangay San Jose sa bayan ng Rodriguez, Rizal kamakalawa ng gabi. Napuruhan sa kaliwang mata na tumagos sa ulo ni Valwinder Singh, may-asawa, at nakatira sa Block 32, Lot 45, Charm Street, Montalban Heights sa nabanggit na barangay. Sa salaysay kay PO2 Jesus Villamor Jr. ng maybahay ng biktima na si Roda Singh, 30, isasara na ng kanyang mister ang tindahan nang biglang dumating ang dalawang suspek na lulan ng motorsiklo. Nagkunwaring mga kostumer ang dalawa at isa sa mga ito ang bumaril sa biktima. Naniniwala naman ang pulisya na hindi holdap ang motibo ng pamamaslang dahil wala namang tinangay ang tandem sa pagtakas.