Lider ng Onad Group, 2 pa arestado

Manila, Philippines -  Rehas na bakal ang binagsakan ng tatlong miyembro ng kilabot na Onad Criminal Group makaraang masakote ng mga operatiba ng pulisya sa inilatag na ope­rasyon sa bayan ng Maragondon, Cavite kahapon.

Sa ulat na nakarating kay P/Chief Supt. Benito Estipona, kinilala mga suspek na sina Ronaldo Gomez “Onad/Walo” Santiago, lider ng grupo; Aldrick Yala “Nonoy” Perez, at si Joseph Lagrimas Hilario.

Ang grupo ay sinasabing sangkot sa panghoholdap, iligal na droga, carnapping, gun-for-hire,  at akyat-bahay.

Nabatid na si Santiago na may warrant of arrest na inisyu ng Tanauan City Regional Trial Court sa Batangas ay nahaharap sa kasong double murder at 15 iba pang kasong kriminal. Nasamsam sa mga suspek ang apat na baril at iba’t ibang uri ng bala.