3 pulis, 2 pa sugatan sa road mishap

MANILA, Philippines - Lima katao ang nasugatan kabilang ang tatlong pulis makaraang aksidenteng magbanggaan ang dalawang behikulo sa kahabaan ng national highway ng Brgy. Boyongan, Placer, Surigao del Norte kamakalawa.

 Kinilala ang mga na­sugatan na sina PO3’s Allen Chua, Ariel Buyan at Nehemiah Doloritos; pawang nakatalaga sa Bayugan City Police Office habang ang mga sibilyan  ay sina Marciano Bacolod , 46-anyos at Jobelle Losquita. Ang mga ito ay mabilis na isinugod sa pagamutan para malapatan ng lunas. Ang tatlong pulis ay kasalukuyang sumasailalim sa Public Safety Junior Leadership Course sa Regional Training School 13 sa Lipata, Surigao City. 

Sinabi ni CARAGA Police Spokesman Supt. Martin Gamba, naganap ang sakuna sa kahabaan ng pakurbadang bahagi ng nasabing highway sa Brgy. Boyongan, Placer bandang alas-4:30 ng madaling-araw.

 Kasalukuyang bumabagtas ang KIA Sportage (KFD 189) na minamaneho ni PO3 Chua sakay ang dalawa nitong kasamahang pulis ng makabanggaan ang Suzuki multicab (LFA-984) na minamaneho naman ni Bacolod lulan si Lasquita sa nasabing lugar.

Isinailalim naman sa kustodya ng Placer Municipal Police Station ang dalawang nagbanggaang behikulo habang patuloy ang imbestigasyon sa kasong ito.