Binata inutas dahil sa tsinelas

TUGUEGARAO CITY, Philippines  - Napaslang ang 28-anyos na binata matapos saksakin ng magsasaka kaugnay sa nawawalang tsinelas sa Barangay San Rafael Alto sa bayan ng Sto.Tomas, Isabela kamakalawa. Kinilala ni P/Supt. Vicente Valdez, tagapagsalita ng Isabela PNP Office, ang biktima na si Zaldy Macapia habang nasakote naman ang suspek na si Diosdado Quilang, magsasaka at kapwa nakatira sa nabanggit na barangay. Sa inisyal na imbestigasyon ng pulisya, lumilitaw na kinompronta ng biktima ang pamangkin ng suspek na si Bernardo Sarambao kaugnay sa nawawala nitong tsinelas subalit naabutan sila ng suspek. Hindi nagustuhan ng suspek ang mga binitawang salita ng biktima sa kanyang pamangkin kaugnay sa paghahanap nito ng tsinelas. Dahil dito, ilang ulit na pinagsasaksak ng suspek ang biktima.