BULACAN, Philippines - May posibilidad na paghihiganti ang isa sa motibo kaya pinagtataga hanggang sa mapatay ang 51-anyos na katiwala ng kanyang kabarong 18-anyos sa naganap na krimen sa loob ng alagaan ng mga sasabunging manok sa Barangay Bulac sa bayan ng Sta. Maria, Bulacan kamakalawa. Nagtamo ng dalawang malalim na tama sa ulo ang biktimang si Ramiro Basa habang tugis naman ng pulisya ang suspek na si Carlo Roaring na kapwa stay-in-worker sa JAMA Game Farm sa nabanggit na barangay. Sa ulat ni PO3 Joseph Aquino, lumilitaw na kalimitang sinesermunan ng biktima ang suspek sa tuwing magkakamali sa trabaho kaya sinasabing nagtanim ng galit ang huli. Nabatid na nilasing muna ng suspek ang kanyang kabaro sa trabaho bago isinagawa ang pamamaslang.