QUEZON, Philippines - Minsan pang napatunayan na kapag ang alak ay sa ulo inilagay at hindi sa tiyan, disgrasya ang pupuntahan matapos mapatay sa saksak ang magpinsan sa inuman sa Purok San Vicente, Barangay Magsaysay sa bayan ng Lopez, Quezon kamakalawa ng gabi.
Kinilala ng pulisya ang mga napatay na sina Lemuel Taracina, 32; at Lesielyn Olanda, 35, habang nasakote naman ang suspek na si Cesar Banagued, 58, marino at nakatira sa Antipolo City, Rizal.
Ayon kay PO2 Christian Magillano, dakong alas-7:30 ng gabi ay nakikipag-inuman ang suspek sa mga kaibigang sina Lemuel, Lesielyn, Leydin Taracina, at Victor Rivadenera subalit nang malasing ito ay naghagis ng bote.
Dahil sa ginawang iyon ng suspek ay sinuntok siya ni Lemuel at naawat naman ng ibang kainuman upang hindi na lumala ang sitwasyon.
Subalit lingid sa kaalaman ng magpinsan ay palihim na nagtungo sa kusina ang suspek at kumuha ng patalim saka pinagsasaksak ang mga biktima.