Mag-asawang OFW dinedo
TUGUEGARAO CITY, Philippines – Napaslang ang mag-asawang overseas Filipino worker (OFW) mula sa Hongkong matapos pagsasaksakin at pagtatagain ng kanilang dating kapitbahay sa Barangay Little Tadian sa bayan ng Alfonso Lista, Ifugao kamakalawa.
Kinilala ni P/Senior Insp. Edgar Tapo, hepe ng pulisya ang mag asawang sina Samuel at Luzviminda Cadiente na kapwa nakatira sa nabanggit na barangay.
Nabatid na namili ang mag-asawa sa kalapit bayan ng Aurora, Isabela nang matiktikan ng magpinsang suspek na sina Melvie Sallaya at Darmo Wasigan na kapwa naninirahan sa kabundukan ng Paracelis, Mountain Province.
Animo’y tinadtad na karne ng baboy ang katawan ng ginang habang nagawa pa ng kanyang mister na isiwalat ang pangalan ng mga suspek bago nalagutan ng hininga sa ospital.
Nilimas ng mga suspek P150,000 cash na inipon pa ng misis mula sa Hongkong at mga alahas na nagkakahalagang P30.000.
Nakipag-ugnayan na ang pulisya sa ilang pinuno ng tribo para masakote ang suspek.
- Latest
- Trending
