Magkapatid nilamon ng dagat

MANILA, Philippines - Nabahiran ng trahedya ang masayang picnic matapos na lamunin ng malakas na alon sa dagat ang magkapatid na lalaki sa beach resort sa Barangay Amoslog sa bayan nag Placer, Surigao del Norte kamakalawa.

Sina Archie Española,17; at Vincent Española, 15; ay kapwa bangkay na ng marekober may ilang oras matapos na lumutang sa dagat.

Sa police report na nakarating sa Camp Crame, nabatid na nagkatuwaan ang magkakamag-anak na magpiknik sa Cagbantoy Beach Resort kung saan habang lumalangoy ang mag-utol ay napagawi sa malalim na bahagi ng dagat.

Ilang saglit pa ay namataan ng kanilang mga kasamahan na nagkakawag sa malalim na bahagi ng dagat pero nabigo ng mailigtas dahil sa bilis ng pangyayari.

Kaagad namang nagsagawa ng search and rescue operation ang pulisya at ilang oras pa ay narekober ang bangkay ng mag-utol.