LAGUNA, Philippines - Dalawang armadong kalalakihan na sinasabing notoryus na holdaper ang napatay matapos makipagbarilan sa mga pulis sa Biñan City, Laguna, kamakalawa ng madaling araw. Kinilala ni P/Senior Supt Gilbert Cruz, Laguna PNP director ang isa sa dalawang napatay na si Joel Dayoc, 39, ng Brgy. Aplaya, Sta. Rosa City, Laguna samantalang inaaalam pa ang pagkakakilanlan ng isa. Lumilitaw na bago mapatay ang dalawa ay hinoldap muna ang factory worker na si Lyn Garcia ng Brgy. Malusak, Sta. Rosa City, Laguna. Natangay ang bag na naglalaman ng cellphone, personal na gamit at P1,000 bago nagsitakas lulan ng motorsiklo. Namataan naman ng pulisya ang riding-in-tandem sa follow-up operation matapos makatanggap ng tawag sa telepono. Sa halip na tumigil ay nakipagbarilan pa sa mga pulis pagsapit sa Garcia Subd. at St. Francis 12 Subd. hanggang sa mapatay ang dalawa sa shootout. Narekober ang granada, baril, mga bala at ang bag ng biktima.