Factory worker dedo sa ex-bf

CAVITE ,Philippines – Tadtad ng saksak sa buong katawan ng iwanan ng suspek ang umano’y ex-girlfriend nito makaraang makita nitong may katabing lalaki sa higaan ng inuupahang kuwarto ng biktima sa bayan ng Carmona kamakalawa.

Kinilala ni Chief Insp. Armandi Dimabuyo ang biktima na si Jamella Rojales, factory workers at residente ng Corehouse Baragay Bucal ng bayang nabanggit.

Mabilis namang tumakas ang suspek na sinasabing ex-boyfriend ng biktima at nakilalang si Marvin Alonso, 35 may-asawa, tricycle driver at residente ng Barangay Maguyam, Silang, Cavite.

Sa imbestigasyon ng pulisya, dakong alas-12:45 ng tanghali ng puwersahan umanong pumasok si Alonso sa inuupahang kuwarto ng biktima at nakitang katabi ni Rojales ang kasalukuyang boyfriend nito na si John Aaron Basero.

Biglang naghanap ng patalim ang suspek at inundayan ng saksak ang biktima.

Dahil sa mabilis na pangyayari, wala na umanong nagawa si Basero sa ginawa ng suspek sa biktima na naalimpungatan din sa ginawa ng huli, matapos umano ang insidente ay mabilis na tumakas ang suspek. Hindi naman nagawang saktan ng suspek si Basero.

Narekober sa bahay ng biktima ang patalim na ginamit na may habang 10 inches na may bahid ng mga dugo.