OFW nag-suicide sa hotel

BULACAN, Philippines — Pinaniniwalaang may problema sa kabuhayan ang isang 47-anyos na overseas Filipino workers (OFW) kaya nagdesisyong mag-suicide sa loob ng hotel sa MacArthur Highway sa Barangay Burol 1st sa bayan ng Balagtas, Bulacan kahapon. Kinilala ng pulisya ang biktima na si Genaro De Ocampo ng Iba Street, Brgy. La Loma, Quezon City. Sa imbestigasyon ni PO2 Richard Lagman, lumilitaw na nag-check-in mag-isa ang biktima sa Peaches and Cream Lodge kamakalawa ng gabi kung saan ipinarada nito ang kanyang kotse (URU 963) sa bakanteng lote. Kahapon nang katukin ng roomboy ang kuwarto ay walang sumasagot kaya napilitang buksan para usisain subalit bumulaga ang nakahandusay na katawan ng biktima sa kama at bumubula ang bibig. Narekober ng pulisya ang suicide note at botelya ng lason na sinasabing nilaklak ng biktima habang patuloy naman ang imbestigasyon.