Kuya dedo sa kabute; mag-utol grabe

MANILA, Philippines - Kamatayan ang naging kasalo sa hapag-kainan ng isang 38-anyos na lalaki habang dalawa pa nitong kapatid ang nasa kritikal na kalaga­yan matapos malason sa kinaing itim na kabute sa Barangay Guadalupe, Carcar City sa Cebu kamakalawa.

Binawian ng buhay dakong alas-2:30 ng hapon ilang minuto matapos na isugod sa Carcar District Hospital ang biktimang si Danilo Dayonot.

Habang patuloy namang ginagamot ang da­lawa pa nitong kapatid na sina Renante at Aileen Dayonot.

Lumilitaw sa police report na namitas ng itim na kabute sa gubat si Danilo na iniuwi nito saka inihalo sa ginisang sardinas para sa panang­halian.

Gayon pa man, ilang oras matapos mananghalian ay nakaramdam ng pamamanhid ng katawan, pananakit ng ulo, tiyan, pagsusuka at ma­tinding pagdudumi ang mag-uutol partikular na si Danilo.

Dahil dito, isinugod ng kanilang mga kamag-anak sa ospital ang mga biktima pero namatay si Danilo habang ang dalawa naman ay patuloy na inoobserbahan ng mga doktor.