MANILA, Philippines - Iniimbestigahan ngayon ng pulisya ang anggulong ‘kidnap me’ sa kaso ng pagdukot sa cooperative manager noong Sabado sa bayan ng Labangan, Zamboanga del Sur .
Ayon kay P/Senior Supt. Jose Bayani Gucela, Zamboanga del Sur PNP director, naghinala ang mga imbestigador sa kaso ng pagdukot kay Remita Daway, 50, cooperative manager.
“We are looking it as kidnap me dahil may problema sa cooperative na hindi pa naayos tungkol sa usaping pananalapi,” pahayag ni Gucela.
Batay sa ulat , ini-report ng pamilya ng biktima sa pulisya ang insidente dakong alas-8 ng umaga sa Barangay Campo Islam.
Lumilitaw na nagmomotorsiklo ang biktima nang harangin at tangayin ng mga armadong kalalakihan na sinasabing tumawag noong Sabado ng gabi at nagde-demand ng P3 milyong ransom na ibinaba sa P1.5 milyon hanggang P.5 milyon kapalit ng kaniyang kalayaan. Gayon pa man, sa pagsisiyasat ay sinabi ng mga nagbabantay sa Cafgu detachment malapit sa pinangyarihan ng insidente na walang naganap na komosyon ng maganap ang insidente.