ABC prexy, anak at bodyguard pinabulagta

BATANGAS, Philippines  – Tatlo-katao kabilang na ang pangulo ng Association of Barangay Captains ang napaslang matapos tambangan ng mga armadong kalalakihan sa bayan ng Bauan kahapon ng mada­ling araw.

Kinilala ni P/Senior Supt. Rosauro Acio, Batangas police director ang mga biktimang sina Chairman Henry Adora, 45, anak nitong si Hanzel Adora, 21 at bodyguard na si Armando Ladignon, 50, pawang nakatira sa Barangay San Miguel sa nabanggit na bayan.

Samantala, nakaligtas naman sa pananambang ang helper ni Adora na si Antonio Dela Rosa.

Ayon sa police report, papauwi na ang mga biktima mula sa Bauan Cockpit Arena sakay ng Mitsubishi Pajero (RBA-265) nang ratratin ng mga armadong kalalakihan na lulan naman ng berdeng L-300 van (UJK-711) sa kahabaan ng highway sa Barangay San Miguel, may 300-metro lamang ang layo sa bahay ng mga Adora bandang alas-3:20 ng madaling-araw.

Bulagta kaagad sina Chairman Adora at Ladignon habang namatay naman sa Bauan Doctors Hospital si Hanzel dahil sa matinding tama ng bala sa ibat-ibang bahagi ng katawan.

Lumilitaw na awayan sa negosyo ang isa sa motibo sa pamamaslang dahil si Chairman Adora ay kabilang sa board of director sa Bauan Cockpit Arena.

Sinisilip din ng mga tauhan ni P/Supt. Alfredo Dangani ang anggulong awayan ng mga maimpluwensyang pamilya sa Bauan ang motibo ng krimen dahil malapit na kaalyado ng mga biktima si Mayor Ryan Dolor.

Bumuo na rin ng Task Force ang pulisya para matutukan ang naganap na krimen.