Pakistani trader kinidnap, tinodas
BATAAN, Philippines – Isa na namang banyaga na negosyanteng Pakistani ang iniulat na kinidnap at pinatay ng mga armadong kalalakihang nagpakilalang mga tauhan ng National Bureau of Investigation (NBI) sa panibagong karahasang naganap sa bayan ng Dinalupihan, Bataan kamakalawa ng hapon.
Kinilala ni P/Senior Supt Arnold Gunnacao ang biktima na si Mohammad Shahid Nadeem, 32, ng Barangay General Luna sa nasabing bayan.
Base sa police report, ang biktimang nagpapahinga sa loob ng pampublikong pamilihan sa Barangay San Ramon sa Dinalupihan nang lapitan ng tatlong kalalakihan.
Nabatid na inimbitahan ng tatlong di-kilalang lalaki na nagpanggap na NBI ang biktima kaya naman payapang sumama ito.
Kaagad naman ipinaabot ng ilang kaibigan ng biktima sa himpilan ng pulisya ang insidente subalit sa beripikasyon sa mga kinauukulang ahensya ng pamahalaan lumilitaw na inilatag na operasyon ang NBI laban sa biktima.
Gayon pa man, noong Martes ng umaga ay natagpuan ang bangkay ng biktima na may dalawang tama ng bala sa batok at ulo sa Gumain River sa Barangay Pabanlag sa bayan ng Floridablanca sa Pampanga.
- Latest
- Trending
