MANILA, Philippines - Dalawang negosyanteng Bumbay ang iniulat na napaslang matapos na pagbabarilin ng hindi pa nakilalang gunman sa naganap na ambush sa Barangay Poblacion sa bayan ng Trento, Agusan del Sur noong Martes. Kinilala ang dalawa na sina Manjeat Singh, 27; at Sukhinder Singh, 26; kapwa nakatira sa bayan ng Nabunturan, Compostela Valley. Base sa police report, naganap ang pananambang sa tapat ng Espina Rice Mill sa Purok 7, Poblacion sa bayan ng Trento dakong alas-6:30 ng umaga. Nagawang maisugod sa Bunawan District Hospital ang mga biktima pero namatay din habang narekober naman sa crime scene ang 5-basyo ng cartridge ng cal .45 pistol at mga basyo ng bala.