MANILA, Philippines - Dinukot ng hindi pa nakilalang mga armadong kalalakihan ang isang negosyante sa naganap na insidente sa bayan ng Datu Odin Sinsuat, Maguindanao kamakalawa.
Kinilala ni Maguindanao Provincial Police Office (PPO) Director P/Sr. Supt. Marcelo Pintac ang biktima na si Dominador Mendoza Berdion, isang alahero mula sa Mandaluyong City na dumayo lamang sa nasabing lalawigan.
Bandang alas- 3 ng hapon habang papalabas sa Hillside Pool Resort sa Brgy. Awang, Datu Odin Sinsuat ang biktima nang sunggaban ng mga armadong kidnapper na nauna nang nakitang umaaligid sa lugar.
Ang biktima ay tinutukan ng baril, kinaladkad at puwersahang isinakay sa isang Isuzu Elf truck (USL-905) ng mga kidnapper na tumahak patungo sa direksyon ng Brgy. Lower Capiton ng nasabing bayan kung saan inilipat ito sa naghihintay na bangkang de motor sa tabing dagat.
Sa follow-up operations ay nasakote naman ang dalawa sa mga suspek na kinilalang sina Norodin Andil at Ryan Usman na nasamsaman ng isang cal. 45 pistol.