Konduktor sinipa palabas ng bus

MANILA, Philippines - Masaklap na kamatayan ang sinapit ng isang kon­duktor ng pampasaherong bus makaraang pagsasaksakin ay sinipa palabas ng sasakyan ng mga holdaper kung saan nagulungan pa ng isa pang sasakyan kamakalawa ng gabi sa Centennial Road sa Barangay Putol sa bayan ng Kawit, Cavite. Kinilala ng pulisya ang nasawi na si Nathaniel Dela Cruz, konduktor ng mini-bus (DVG-743) na minamaneho  ni John Mark Azures. Lumilitaw na apat na armadong lalaki ang sumakay sa bus at nagdeklara ng holdup pero nanlaban ang biktima bunsod upang saksakin ito at sipain palabas ng bus. Matapos na humagis palabas ng bus ay nagulungan pa ang biktima ng isa pang paparating na sasakyan kaya agarang nasawi. Matapos makulimbat ang mga personal na gamit ng  mga pasahero mabilis na tumakas ang mga suspek. Joy Cantos at Cristina Timbang