Preso nang-hostage

MANILA, Philippines - Dahilan sa matinding pangungulila sa kaniyang pamil­ya, hinostage ng isang preso ang apat nitong kasamahan sa loob ng Pampanga Provincial Jail sa 13 oras na hostage drama sa San Fernando City kahapon.

Ayon kay Pampanga Provincial Police Office (PPO) Director Sr. Supt. Edgardo Tinio, dakong ala-1 ng madaling araw ng ihostage ng inmate na si Wilfredo Lorilla alyas Toto gamit ang isang patalim ang kaniyang mga kasamahang preso.

“Walang dumadalaw na pamilya, mentally disturb siya kaya nang-hostage,” ani Tinio base sa imbestigasyon ng pulisya. Kabilang sa mga hinostage na preso ay si Bernard Narciso, ang sinaksak na si Jonathan Miranda at dalawang iba pa.

Ayon naman kay PNP Spokesman Chief Supt. Agri­mero Cruz Jr., agad na pumalibot sa nasabing piitan ang Special Weapons and Tactics Team upang umasiste sa provincial warden sa negosasyon kung saan ang demand ng suspek ay dalawin siya ng kaniyang pamilya.

Samantalang matapos namang mapahinuhod ang suspek na paparating na ang pamilya nito ay sumurender ito dakong alas-2 ng hapon kay Tinio at sa Provincial Warden. Inihahanda na ang pagsasampa ng kasong kriminal sa naturang preso.