Magsasaka dinedo sa hapag-kainan

KIDAPAWAN CITY, Philippines — Napatay ang isang 59-anyos na magsasaka habang sugatan naman ang anak nito matapos pagbabarilin ng ‘di-kilalang lalaki sa naganap na panibagong karahasan sa Barangay Binoligan, Kidapawan City, North Cotabato noong Sabado ng gabi.

Dalawang tama ng bala sa dibdib ang tumapos sa buhay ni Solomon Cadungog habang ginagamot naman sa ospital ang anak na si Shahana, 17.

Ayon sa police report, naghahapunan ang mag-ama sa loob ng kanilang bahay sa nabanggit na barangay nang pasukin at ratratin ng gunman. Batay sa testimonya ng ilang nakakilala sa biktima, dalawang beses nang may nagtangka sa buhay nito.

Nagtago rin ang biktima sa General Santos City at nang bumalik ay binalikan din siya ng kalaban. Blangko ang pulisya sa motibo ng gunman habang patuloy ang imbestigasyon.