CAMP SIMEON OLA , Legazpi City, Philippines — Isang 14 anyos na estudyante ang nasawi matapos na ito ay hatawin ng matigas na bagay sa ulo ng hindi pa nakilalang salarin sa bigong pagnanakaw sa loob ng Indoplex Site, Purok 4, Libong, Sto. Domingo, Albay kamakalawa. Hindi na umabot pa ng buhay sa Bicol Regional Training and Teaching Hospital (BRTTH) ang biktimang si Kyoto Evasco, 14, binata, 1st year high school sa Sto. Domingo National High School at residente ng Brgy. Padang ng naturang bayan. Sa ulat ng pulisya, bandang alas-8 ng gabi habang ang biktima na nagsi-sideline bilang bantay sa gabi ng naturang kumpanya ay nagroronda nang makarinig ng ingay ng paglalagare ng mga kawatan sa inabandonang gusali sa compound. Agad namang ininspeksyon ito ng biktima pero hinataw ito sa ulo ng isa sa mga suspek kung saan nakita na lamang itong nakabulagta ng kaniyang mga kasamahan. Isang hot pursuit operation ang inilunsad laban sa mga suspek.