3 Bolt-Cutter Gang dedo sa shootout
BATANGAS ,Philippines – Tatlong kalalakihan na pinaniniwalaang miyembro ng Bolt Cutter Gang ang napatay matapos makipagbarilan sa mga alagad ng batas sa bahagi ng Barangay San Roque sa bayan ng Sto. Tomas, Batangas kahapon ng madaling-araw.
Kinilala ng pulisya ang mga napaslang na sina Leoncio Vallentos ng Cebu City; Diosdado Escrada ng San Isidro, Mabini, Bohol; at si Francisco Lacuarin ng Barangay Calamansian, Caloocan City.
Sa ulat na nakarating kay P/Senior Supt. Rosauro Acio, nagpapatrolya ang mga pulis lulan ng mobile patrol car nang matiyempuhan ang dalawang lalaki na kahina-hinala ang mga ikikilos sa harap ng computer shop bandang alas-4:45 ng madaling-araw.
Tinangkang lapitan at sitahin ang dalawang lalaki subalit biglang nagpulasan kung saan mabilis na sumakay sa kanilang owner-type jeep na minamaneho ng kanilang kasabwat.
Nagkahabulan ng ilang minuto hanggang sa makorner ang sasakyan ng tatlo na imbes na sumuko ay nakipagbarilan sa mga pulis.
Hindi na nakalabas ng sasakyan ang tatlo matapos na mapatay kung saan narekober ng isang bolt cutter, crow bar at tatlong baril.
- Latest
- Trending
