MANILA, Philippines - Inaresto ng mga awtoridad ang isang Kenyan national na galing Qatar matapos itong masamsaman ng tatlong kilo ng shabu sa isinagawang inspeksyon sa Mactan Cebu International Airport sa Cebu City kamakalawa ng hapon.
Kinilala ang nasakoteng dayuhan na si Asha Atieno Ogutu, 24-anyos.
Bandang alas-4 ng hapon ng lumapag ang suspect sa nasabing paliparan lulan ng Qatar Airways Flight 656 na galing Doha, Qatar.
Nabatid na hindi nakalusot sa matalas na pang-amoy ng K9 dogs ng security personnel ng paliparan at National Bureau of Investigation (NBI) Region 7 operatives ang nasabing dayuhan na nakunan ng shabu sa bagahe nito.
Kasalukuyan namang iniimbestigahan ng mga awtoridad kung sino ang lokal na kontak ng suspek sa pagbiyahe nito sa Cebu na may dalang droga.