Batangas, Philippines – Lima katao ang nasugatan matapos araruhin ng isang container truck ang dalawang pampasaherong bus sa loob ng Southern Tagalog Arterial Road (STAR) Tollway kahapon ng umaga. Ayon kay Elizalde Mediano, STAR Tollway radio operator, nakapila ang Ceres bus(UVA-475) at RRCG bus (PWV-583) sa northbound lane ng toll booth sa Sto. Tomas, Batangas nang banggain sa likurang bahagi ng truck (RJW-644) na minamaneho ni Reynaldo Furiaque bandang alas- 5 ng umaga. Mabilis namang naisugod ang mga sugatan sa St. Cabrini Hospital para lapatan ng lunas. Lumalabas sa imbestigasyon na nawalan umano ng preno ang truck na may lamang flammable materials hanggang sa mabangga ang mga bus.