3 holdaper tumba sa shootout
SOLANO, Nueva-Vizcaya, Philippines – Tatlo sa apat na miyembro ng robbery/holdup gang ang iniulat na napatay matapos makipagbarilan sa mga alagad ng batas sa masukal na kagubatan sa Barangay Minanga sa bayan ng Penablanca, Cagayan kahapon ng madaling-araw.
Sa police report na ipinarating kay P/Chief Supt. Mao Ranada Aplasca, kasalukuyang bineberipika ang pagkakakilanlan sa tatlo habang tugis naman ang isa pang holdaper na mabilis na tumakas sa kasagsakan ng putukan.
Bago ang sagupaan ay nakatanggap ng impormasyon ang mga awtoridad sa presensiya ng mga armadong kalalakihan sa liblib na bahagi ng Barangay Minanga.
Kaagad naman rumesponde ang mga alagad ng batas kung saan sumiklab ang sagupaan bandang alas-3:30 ng madaling-araw.
Narekober sa encounter site ang dalawang motorsiklo, dalawang cal.45 pistol, UZI machine pistol at iba’t ibang bala.
Wala namang palatandaang mga rebeldeng New People’s Army ang tatlo kung saan natukoy na mga miyembro ito ng notoryus na robbery gang. Raymund Catindig at Joy Cantos
- Latest
- Trending
